Innköllun á Volkswagen, Skoda og Audi bifreiðum

Volkswagen samstæðan hefur tilkynnt um innköllun á ákveðnum gerðum Volkswagen, Skoda og Audi ökutækja í varúðarskyni vegna mögulegrar tæringar á bolta sem festir stýrisvél við undirvagn. Ef tæringin verður mikil getur festingin veikst og í verstu tilfellum getur stýring bílsins skerst eða tapast.

Á Íslandi nær innköllunin samkvæmt fyrirliggjandi upplýsingum til um 2.230 Škoda-bifreiða af gerðunum Karoq, Kodiaq, Octavia og Superb, 378 Volkswagen bifreiða af gerðunum Golf, Tiguan og Touran ásamt tveggja Audi Q3 bifreiða. Alls eru þetta um 2.610 bifreiðar af árgerðum 2015 til 2024.
Eigendur viðkomandi bifreiða munu fá sent bréf frá Heklu með nánari upplýsingum um næstu skref.

Lagfæring felst í að skipta boltanum út fyrir bolta með aukinni tæringarvörn. Ekki liggur enn fyrir hvenær varahlutir verða tiltækir á Íslandi.
Eigendur bíla sem falla undir innköllunina fá tilkynningu þegar varahlutir berast og geta þá bókað tíma hjá Heklu eða viðurkenndum þjónusturverkstæðum.

Samkvæmt upplýsingum frá framleiðanda hefur ekkert slys eða atvik sem rekja má til þessa máls verið tilkynnt og óhætt er að nota ökutækin þar til komið er að lagfæringu.

Hekla leggur ríka áherslu á öryggi viðskiptavina sinna og mun tryggja að framkvæmd innköllunarinnar gangi hratt og örugglega fyrir sig og er viðskiptavinum að kostnaðarlausu.

Ef einhverjar spurningar vakna er hægt að hafa samband við hekla@hekla.is

Ef óvenjulegt málmhljóð heyrist framan úr bílnum eða breyting verður á hegðun stýris skal stöðva á öruggum stað, ekki aka lengra og hafa samband við viðurkenndan þjónustuaðila.